豪食の記: 5月 2015

2015年5月31日星期日

喜喜冰室：充滿舊香港味道的茶餐廳　食氣氛夠晒

想試好耐的喜喜冰室擺到明玩香港懷舊風格，不論係餐廳室內設計、餐廳內的擺設及器皿、食物以及伙記的服裝造型，都注入有關舊香港的元素落去，淨係食個環境都值，食物質素講真又唔係話好好食，但個種情懷其實可以搵得返，呢種情係用錢買唔到的，伙記都好街坊，好Nice，香港呢份人情係現今好難再搵到，呢間餐廳值得一黎再黎。

餐牌用上牛皮紙做底，字體當然用懷舊字型，食物種類唔多但好多都係以前先食到的，好有心的餐食。

粟米忌廉湯，唔好睇少佢，雖然唔係特別好味，但係成個Form都好舊式，加分。

呢隻餐飽已經好少見，咁樣俾牛油更加難見，麵包好鬆軟，好食。

鐵板蒜蓉汁西冷牛扒配意粉($125)，岩岩好，肉質幾軟，幾香。

鮮茄焗牛脷飯，正常味道，足料，不錯。

單據用上特大木夾夾住，玩味十足又有香港味，好正。

好耐冇見的不锈鋼糖兜

係用夾方糖，極懷舊。

店內環境：

以前舊式餐廳係用呢隻蓋蓋住餐飽保暖

用兒時玩具作掛牆擺設，典型硬sell 香港手段

呢一堆係舊香港東西必會出現既野，好想要，唔知邊度有得買

老闆同我吹兩咀就係左邊個個錢罌，話呢一代一定未見過，呢個係一定要打爛先拎到錢既錢罌，極具珍藏價值，好似話灣仔有得買。

男廁入面室內設計亦都好玩味，用化妝燈鏡去裝飾，好特別，好似以前班影星照鏡化妝咁。

呢句好明顯係俾自由行睇

舊式生锈水龍頭，點搵返黎架究竟。

呢道假門好搞笑，表面上右邊手柄係用黎開門，咁就大錯特錯，佢只係裝飾，人地明明貼左張推字貼紙係左邊，左邊開門先真。

餐廳門口：

喜喜冰室
地址：銅鑼灣加寧街8號海倫大廈地鋪
電話：2868 0363
評分：8/10

2015年5月26日星期二

Sweets House Cha Cha：味道濃郁　芝麻醬流住食

綠茶雲呢拿雪糕配綠茶涼粉紅豆小丸子，正常味道，不甜，感覺清新。

特濃黑芝麻麻醬配北海道牛乳綠茶軟雪糕($38)，芝麻醬極香，極濃郁，醬係一直流住，放入口後流住食仍然保持芝麻醬既濃味，真係好好食。

黑芝麻系列係期間限定，能夠食到真係好正，好愛呢個芝麻醬軟雪糕。

長期多人排隊，因為真係好食，值得一排再排。

Sweets House Cha Cha

地址：尖沙咀廣東道17號海港城3樓city'super內

電話：2375 8222

評分：8.5/10

2015年5月24日星期日

Holly Brown：色彩繽紛　賣相好又唔太甜

雲呢拿彩虹糖雪糕($54)，膠餐具，賣相靚，難怪長期有人排隊爭相購買。

藍色雲呢拿雪糕真係第一次食，唔會太甜，加埋彩虹糖色彩繽紛(我仲要特登叫佢俾多D彩虹糖)，令我唔捨得食添。

真係長期多人，要食一定要有耐性。

我係選擇坐係度食，寫意D嘛。

Holly Brown
地址：銅鑼灣軒尼詩道500號希慎廣場3樓318-319號鋪
電話：2167 8361/／2167 8362
評分：7.5/10

2015年5月14日星期四

御花園咖啡室：半價優惠，半價質素

女友有半價優惠咭，所以毫不猶豫用一用，試一試富豪酒店旗下的Buffet，選了銅鑼灣富豪酒店，其實小朋友期間已試過一次，印象很模糊，現在我明白點解，因為真係食完都唔記得，唔係唔好食，只係極之普通，款式又唔算話好多，基本上Buffet應該有既都會有，沒甚驚喜，我個晚都唔飽的，正因為款式令我冇乜食慾；客人反而係香港一定大細為主，或者係因為價錢平啦。