秋味啤酒：易入口 麥芽味不濃 比較淡口

之前我並冇留意到有呢個名既啤酒，仲要好似係秋季限定，試下無妨，老實講，我並唔太識飲酒，意思係酒味既分析，我只覺得幾淡口，對新手黎講會比較易入口，佢有標籤係有麥芽成份，但感覺不太濃，我自己都比較OK淡口啤酒，秋味不俗。

秋味啤酒
地址：各大超市
售價：$10
評分：6/10

北海道啤酒啫喱：聞就有酒味 食就冇味

呢隻啤酒啫喱我相當好奇，究竟陣味會係點架呢？結果大失所望，真係得個Gimmick，以為個名有北海道，實係差極有個譜啦，點知聞就有啤酒味，少少啦咁，食就完全冇味，一個無味啫喱其實係幾咁唔好食，或者做一個啤酒啫喱唔應該用平時飲啤酒既味道去食，純粹以食啫喱既心態去食，或者好一點吧。

北海道啤酒啫喱
地址：Citysuper
售價：$48
評分：3/10

CHOCOBONS草莓味及焦糖咖啡夾心巧克力：草莓味軟 焦糖味濃

CHOCOBONS推出的草莓味及焦糖咖啡夾心朱古力，原本以為會好似麥提莎咁"索索聲"同埋好甜，點知呢款朱古力糖(我當係糖)落去軟淋淋，食到有點抗拒，有點打冷震，可能我唔慣個質感，草莓味就好重假草莓個隻味，搶左朱古力本身個味；而焦糖咖啡比較好，冇咁搶，食落都幾香幾濃焦糖味，平時咬下咬下都幾過癮既。

CHOCOBONS草莓味及焦糖咖啡夾心巧克力
地址：一田超市
售價：$8(草莓味)、$7.9(焦糖咖啡味)
評分：3/10、6/10

Pringles薯片 - 芝士辣醬味：重芝士味 少少辣 幾惹味

呢樽Pringles薯片我係九州一間便利店入面見到，本身我比較少食Pringles薯片，原因係我唔覺好味，口感唔太好，又唔夠脆，但發現呢款未見過，而又見到辣椒圖案，所以先有興趣買黎食下，咁細樽都幾好，其實份量我覺得岩岩好，但都分左兩次食，因為真係好濟，味道就唔錯喇，重芝士味，少少辣，食食下都已經食左幾塊都唔知，但食Pringles我覺得最大問題係以我為例永遠都唔可以一次過食晒，真係好濟！

評分：6/10

新薯薯片 - 薯仔沙律味：係有沙律但唔想食得多既薯片

薯仔沙律味薯片我真係未見過，之但係本人對於沙律其實有點抗拒，但為左試新野都要試下既，感覺第一口係好重沙律味，所以不太喜歡，食多幾塊已經Feel到唔想再食落去，其實應該唔係薯片既問題，而係對於沙律有幾愛好既問題，我就感覺一般喇。愛沙律或者會食得好開胃既。

新薯薯片 - 薯仔沙律味
地址：Citysuper
售價：$12
評分：5.5/10

正冬魚塘公火鍋：烤魚不俗 其他沒甚特別

又係團購，今次係食烤魚火鍋+放題打邊爐，其實我都預左團購既話，質素唔會係好好個隻，但今次係俾個烤魚吸引到，所以甚至去到黄大仙都想去試試。

食完後覺得條魚都唔錯，雖然明知係雪藏魚，鮮味欠奉，不過食落去係幾滑，而今次點既湯底係冬蔭功湯底，冬蔭功湯X烤魚係真係未試過，之後仲要用冬蔭功湯打邊爐，第一次而且唔算好差，唔算好辣但夠味，不過去到打邊爐放題部份就沒甚特色，都係個D食慣既材料，驚喜不大。

冬蔭功湯底既烤魚，睇表面以為好辣，其實辣味好輕，而幸好條魚算係滑，幾入味。

烤魚+放題打邊爐(原價$118/位，團購$98/位，另收$10/位茶錢)

打邊爐放題都係個D材料，其實唔會食得好多，因為真係好飽。

正冬魚塘公酒家

地址：黃大仙環鳳街33號鳳祥樓1樓

電話：2320 2700

評分：6/10

Studio City Bar & Cafe：水準不俗 食濟收場

事關做左UA會員後，得到一疊優惠券，其中一張就係呢間西餐廳既$100現金券，其實經過呢間餐廳好幾次，呢次都可以話終於有機會諗過去試下呢間野，次次見到唔太多人，但裝修又唔錯，又同電影有關。唔講咁多，整體食完後都覺得水準唔錯，當然未去到好好食個隻，作為一個西餐都算係應有盡有，而價錢方面亦都算係貴左少少（按食物質素去計），唔怪得唔係好多人黎食，我同女友於今次都食到好飽，應該話好濟先岩，尤其係個肉眼扒，偏肥，肥膏真係好勁，亦因為咁煎到5成熟後岩岩好，肉汁豐富，肉質都好林，食完塊扒都好濟了，當然最出色既係薯條，唔係因為我好鍾意食，而係因為佢真係厚切薯條，超級粗超級長，加上黑松露忌廉醬，真係好好食，但都係個句：好濟。

香辣水牛城雞槌配芝士醬($88)，少少失望，因為以為係炸，點知似灼完後再加醬，所以食落雞肉比較淡味，多得D醬汁調一調味，不過芝士醬好好食，好Lim，芝士味好強烈。

厚切薯條配黑松露忌廉醬($72)，絕對值得推介，除左因為好粗好長外，碟黑松露忌廉醬都加左好多分，黑松露好香好濃，配合薯條原來好夾，難得冇用茄汁，係一個新鮮食法。

美國安格斯肉眼扒(12oz)($325)，係女友必食之選，好彩因為佢先食到呢塊幾好味既扒，係略嫌好貴，不過肥瘦度我岩，偏肥，肉質好林，肉汁好夠，不過食完好濟，附送既茄子及蘆荀都好香好好食。

麵包蟹肉蟹膏意大利飯($165)，真係好勁蟹味，亦都有好多蟹肉，算有誠意之作，食落一貫意大利飯要有既質感，不錯。

Studio City Bar & Cafe
地址：九龍灣宏照道38道MegaBox 11樓12號鋪
電話：3543 5638
評分：7.5/10

Danish Bar：粒粒皆鬆軟 口感質感並存

行行下海港城，見到有班人堆係一間鋪頭，於是望下乜傢伙，見到一粒粒類似酥既波波，形狀都幾吸引，而小弟都幾喜愛酥既食物，見價錢合理就買黎食下，熱辣辣又真係幾好食喎，我買既係朱古力丹麥球，咬落去好有酥本身應有既口感，入口即溶，質感亦都好好，好鬆軟，易咬有咬口，好快食完一個，而朱古力味唔算太濃，冇搶去酥本身既質感，唔怪得咁多人買，食物上仲有另一款條條狀，不過我相信丹麥球會食得過癮得多，唔駛諗，快食完嘛！

Danish Bar
地址：尖沙咀海港城Citysuper
售價：$14/4個 (丹麥球)
評分：8/10

Hansen's 柑桔酸橙味梳打汁：超淡味的梳打汽水

行行下口乾，入左去Citysuper買野飲，見到呢隻牌子未飲過又想飲橙汁，於是試試佢，點知梳打汁過多，令到橙味甚至柑桔味好淡，似係飲緊甜的梳打汽水，不過咁便就知唔會好飲得去邊，天時暑熱飲下都冇所謂既，仲有隻味道係奇異果士多啤梨味，好彩試左個最穩陣既橙味，另一隻味見到咁多存貨係度就知唔試好過試喇。

Hansen's 柑桔酸橙味梳打汽水
地址：各Citysuper
售價：$7
評分：4.5/10

HORN明治紫薯朱古力曲奇條：卜卜脆夾紫薯Cream 淡味有口感

眼見係期間限定，有理冇理買黎試下食，仲要係紫薯味，近黎紫薯系列大熱，其實我又覺得唔係話好好食，呢一款食落有口感，卜卜脆，餅中間夾住紫薯Cream，味道偏淡，作為間中攝下牙罅都係一件樂事。

HORN 明治紫薯朱古力曲奇條
地址：一田超市
售價：$10.9
評分：7/10