Karamucho 薯片 - 強勁辣椒味：又唔算勁辣既薯片

之前都未見過呢隻牌子既薯片，就試一試佢，見到又係牛扒相，感覺將唔會有十分出眾既味道，而佢Sell既係強勁辣椒味，可惜唔算話十分辣，連熱浪都比不上，味道尚可但無甚特別，如果俾我揀熱浪真係好一點。

Karamucho 薯片
地址：CitySuper
售價：$12
評分：6.5/10

江畸固力果 - 炸雞及黑椒煙肉：送酒一流 又鹹又脆但熱氣

對於呢一類炸物我開始產生興趣，因為口痕時可以食，睇波時食仲爽，可以食極都仲想繼續食，呢類炸粒粒送酒認真一流，兩款都鹹鹹地，而且有好香口既肉味，唔Dry，咬落去索索聲，只略嫌好熱氣，食完喉嚨即刻有少少痛，不過呢個小食的確可以encore，一邊睇波一邊食。

江畸固力果 - 炸雞及黑椒煙肉
地址：28 Food
售價：$11.8
評分：7.5/10

明治京抹茶朱古力片：濃味搽茶 唔甜偏淡

近黎都興抺茶零食，於朱古力系列比較推出多款，我就較有興趣係呢款朱古力上，一來係扁正方形，比較少食，嚐味範圍較大，而且明治出品，又應該會好掛。呢款朱古力都有幾濃既抹茶味，不過味道偏淡而唔甜，或者呢個可以將抺茶既原味完整地呈現出黎。

明治京抺茶朱古力片
地址：松板庫
售價：$31.2
評分：6.5/10

卡樂B故鄉食堂蔬菜片 - 鰹魚醬油味：有新鮮感 將會係趨勢

卡樂B新推出既故鄉食堂系列第一炮係蔬菜片，非常聰明做法，因為一定唔會難食，而且呢款零食已經開始越見越多，係有種新鮮感，不再一味只食薯片、蝦片，而係多左蔬菜片，遲D相信實有其他唔同類型既炸物零食出現，講返呢款蔬菜片，主要有蘿蔔、南瓜、薯片，都係略帶少少鹹調調味，又有唔同種類既炸片，令食者唔覺悶，而且顏色鮮艷，包裝上又見特別，色彩更能吸引顧客去買，呢次就算唔好食成個Package都覺得出色。

卡樂B故鄉食堂蔬菜片 - 鰹魚醬油味
地點：CitySuper
售價：$14
評分：8/10

卡樂B薄餅薯片 - 韓式燒肉：不太強燒肉味 只靠薯片上粒粒搶味

韓式燒肉味：一諗就會諗到好重味，會有好強勁既韓燒味，即係臭味。不過食第一塊後反而唔太覺有好強既燒肉味，眼見到薯片上面有既係疑似芝士粒，反而呢D粒粒搶了味，令到薯片先有味，其實咁樣既情況係反而失敗，因為佢賣既係燒肉，但反而搶味既係薯片上的粒粒，所以呢款唔算出色。

卡樂B薄餅薯片 - 韓式燒肉
地點：CitySuper
售價：$14
評分：5/10

卡樂B春之薯片 - 鹽味：鹹得黎幾好食 有越食越想食感覺

卡樂B真係有好多款包裝不同方向既薯片，真係好識做生意，只係包裝都可以吸引到人去買，呢款春之薯片又再一次吸引到我去買，仲要又係期間限定，點會唔試呢？呢一味又的確係好食，佢主打係坑紋薯片，而且係鹽味，亦都落重料，鹹味足夠而且食到脆卜卜，有越食越想食既感覺，淨係呢點已經贏左，而且鹹味薯片係卡樂B又好少失手，呢款值得食。

卡樂B春之薯片 - 鹽味
地址：CitySuper
售價：$13.2
評分：7.5/10

品客薯片水牛城辣雞翼味：只覺得膩 毫無肉感

又黎Pringles薯片，今次輪到水牛城辣雞翼味，諗住有D新鮮感，應該會唔錯，點知都係一樣，食落都係味精味，唔覺有雞翼味，甚至係肉味，又唔辣，咁究竟水牛城即係點呢？唔覺有咩突出，都係同一問題，好膩。

品客薯片水牛城辣雞翼味
地址：各大便利店
售價：$8.5
評分：4/10

品客薯片煙燻薯仔沙律味：好膩 沙律醬的重令人難再食

小弟再從申一次我係對Pringles冇乜好感，只係見到佢有新味先至買黎試，我總覺得Pringles薯片口感唔好，唔脆，味好味精，食幾塊會好唔想再食因為好Dry好濟，就算我食左呢隻新味，都唔會對佢改觀，尤其呢次更係沙律味，係更膩，沙律醬既味極濃令到我好唔想再食落去，我係不停飲水而唔想咁Dry，食薯片食到咁係Pringles先可以。

品客薯片煙燻薯仔沙律味
地址：各大便利店
售價：$8.5
評分：4/10

不二家抹茶餘韻夾心朱古力：不重抺茶味 沒有餘韻既

呢次都係因為包裝而買，加上有我喜歡既抺茶元素，諗住一定好食，但呢次中伏了，不但冇口感，而且唔覺有好抺茶味，佢所命名既余韻更係失笑，何來餘韻？朱古力？抺茶？兩者都唔覺有咩餘韻，食完後完全唔覺有食過野咁，更冇任何味道留係口腔內，所指的余韻係失敗的。

不二家抺茶餘韻夾心朱古力
地點：SASA
售價：$19.9
評分：5/10

Bake濃滑朱古力：入口鬆即溶沎 朱古力的確濃

事前我未見過呢隻牌子既朱古力零食，見到包裝吸引就想買左佢，結果得到好感，好食。一口朱古力脆餅，一食入口即有溶化感覺，外皮的餅很脆亦很鬆化，與朱古力好共融，而且朱古力的確濃味，係食到唔停得口既朱古力餅。

Bake濃滑朱古力
地址：SOGO
售價：$18.9
評分：8/10