日本樂天綠茶鬆脆批：死實實 欠綠茶味道

食左呢個零食後，有時會覺得759 D野雖然好平，但零食質素都幾參差，就好似呢款我以為係酥之類既野，又或者係似泡芙，點知佢兩樣都唔係，係一粒死實實既粉狀物體，入面有綠茶狀既固體，我以為好濃味，點知欠缺綠茶味，兩者唔出色更顯得呢個零食極度失敗，失望而回。

日本樂天綠茶鬆脆批
地點：759阿信屋
售價：$13.9
評分：3.5/10

Haagen-Dazs 純屬我的浪漫花園：清新為主 味道較淡

Haagen-Dazs久久都冇出新味，一出就出兩隻味，今次以清新為主，味道都算係奇怪，唔太認識佢地，今次係值得一試既，兩隻各有各好，紅色那杯雖以荔枝味主打，但荔枝味確係幾假，又係得個甜字，但加埋玫瑰元素，Balance返都係淡味的；黃色的係杏桃味，比較易入口一點，似食杏桃蛋糕咁，幾Fresh，加埋大眾都岩既薰衣草，味道較荔枝的易接受，整體黎講，呢兩隻味雖然主打唔太甜，生果感覺較重，但食一次便夠，還是食返曲奇味或綠茶味較出色．價錢稍貴。

Haagen-Dazs 荔枝紅桑子玫瑰雪糕／杏桃薰衣草雪糕
地址：7-11便利店
售價：$27.9/杯
評分：6.5/10

卡樂B Jagabee紫菜梅味薯條：竟然鹹鹹地 梅味較少

今次輪到出梅味x紫菜味，本身我幾抗拒紫菜，不過作為粉絲就要作出嘗試，不過食落竟然冇乜紫菜味，一開始食幾條係有幾條少少梅味，少少酸，但之後食落就偏鹹鹹地，易左接受，因此我覺得呢個crossover唔錯，算係幾特別且驚喜的味道。

卡樂B Jagabee紫菜梅味薯條
地址：一田超市
售價：$14.9
評分：7.5/10

卡樂B西班牙海鮮飯味薯片：平平無奇 味道尚可

另一雷聲大兩點小的薯片，好似好好味，其實無乜特別，薯片味道有如淡味珍珍薯片，唔太感覺到海鮮飯味，可能係本身飯味都唔太出味既關係，食落去DD鹹，食完立即唔記得味道既薯片。

卡樂B西班牙海鮮飯味薯片
地址：一田超市
售價：$9.9
評分：5.5/10

明治HORN牛奶朱古力夾心餅：餅乾鬆化 朱古力醬香濃

HORN系列既餅一血都唔錯，餅乾都係做到鬆化效果，而入面既醬都好夾到個餅，夠味，今次出既係牛奶朱古力味，自然更容易得到人歡心，的確今次幾夾，餅仍然係鬆化，一咬就碎，而入面既朱古力醬都好濃，夠味，今次不會失望。

明治HORN牛奶朱古力夾心餅
地址：759阿信屋
售價：$22.5
評分：7.5/10

大金槍魚脊骨高湯香醇魚介鹽杯麵：名大於實 魚湯好鹹

初初睇佢既介紹係吹到好鬼好食，賣斷市搶手貨，心諗有幾巴閉呀！見佢有貨當然要睇佢係咪貨真價實先，仲要成$22杯，好鬼貴，點知食完覺得名大於實，麵仍然係普通的杯麵既麵，只係多左幾粒所謂既肉粒，好！當我將重點放返係佢推介既魚湯時，係有少少既濃味魚湯，唔知係咪我落既湯包太多，好鹹！就算我唔落好多既魚湯包，我都唔覺得會令個杯麵加好多分，勉強講佢只係好過市面上既杯麵，係因為佢係魚湯底之嘛。

真係好普通杯麵材料咋，仲以為會有魚添，點知得幾粒肉粒仔。

有埋証書，呢鋪都幾巴閉喎！

大金槍魚脊骨高湯香醇魚介鹽杯麵
地址：28 Food
售價：$22
評分：6.5/10

銀座雙重朱古力：餅及朱古力融合得宜

繼續朱古力系列零食，今次有朱古力餅，而呢個朱古力好食之處亦都係最簡單既餅及朱古力融合得宜，有溶化感覺，亦有好強烈朱古力味，咬落去亦有脆的感覺，細粒放落口又會唔經唔覺食左幾粒，止口痕之選。

銀座雙重朱古力
地址：28 Food
售價：$9.8
評分：7.5/10

John Lusty 忌廉蟹皇湯：聞時有蟹味 飲時有腥味 頂唔蒲

唔怪得之前係一田裡面呢款湯有大減價，冇記錯都有七至八折，眼見包裝不錯，應該會幾好飲，加上係蟹皇湯，差極有個譜呀，點知一開蓋，係有蟹味既，但隔左陣之後就覺得唔多對路，開始有D腥味，煲完後飲喇，嘩！頂唔蒲！

KOIKEYA Slim Bag 特製辣椒味薯條：辣得黎惹味 脆卜卜好咬口

呢款薯條真係未見過，佢並唔係Jagabee個隻好薯條樣既正常薯條，佢既風格係偏向脆米餅既咬口但有食SHAKE SHAKE薯條既感覺，呢個特製辣椒味做到色香味俱全，先係外型係偏幼及扁，食要成幾條食先覺滿足，而且顏色上偏橙紅，已感覺到辣味應該會好勁；味道上的確冇失望，係幾辣，係可以食完之後個喉嚨仍然維持個隻辣味一段時間，都幾厲害既，而且辣味比較少食到，唔似平時食熱浪或者其他辣味薯片既味道，呢款薯條值得一食。

KOIKEYA Slim Bag 特製辣椒味薯條
地址：Citysuper
售價：$8
評分：8.5/10

粟一燒 日式咖喱吉列豬扒味：粘有咖喱粉有炸味既粟一燒

我對粟一燒真係冇乜好感，呢次應該係最後一次食，短期內唔會再食，原因係覺得味道唔太好，好假，始終好炸物感覺，唔得實在。呢次係好地道既味道咖喱豬扒味，本身預左只有咖喱味而好難食到有吉列豬扒味，果然，除左有好基本既好重咖喱味既粟一燒，就只食到炸物感覺既粟一燒，好似係唔係豬扒都唔再重要，講到尾，都只係想食有味既粟一燒姐，炸乜都唔係重點了，咖喱味係好重，但整體只有咖喱味。

粟一燒 日式咖喱吉列豬扒味
地址：各大便利店
售價：$9.9
評分：5.5/10

Cacalat 朱古力蛋糕：普通的名牌副產品

之前飲過呢隻牌子既朱古力奶，感覺並不特別及出色，見到有副產品朱古力蛋糕面世，又平就買黎試下，口感一般，跟普通朱古力蛋糕無異，好普通，試一次便算了。外層有層朱古醬包主蛋糕，但內裡卻係一般朱古力蛋糕，今次真係只係試個牌子吧。

Cacalat 朱古力蛋糕
地址：一田超市
售價：$5
評分：6/10

REMY MARTIN 朱古力：酒味不及Jack Daniel's重

自從上次食左Jack Daniel's 威士忌朱古力後，開始喜歡食酒心朱古力，呢次輪到REMY MARTIN，同一情況係食落去有酒液係朱古力入面，不過酒味唔及上次的濃烈，不過都好食，我會繼續食多幾款呢類朱古力。

REMY MARTIN朱古力
地址：各大超市
售價：$140
評分：7.5/10

Jack Daniel's Tennessee Whiskey朱古力：好酒的一定Like

對於酒味朱古力我就食得比較少，比較接觸，係超市難得見到有威士忌既朱古力，即刻要買黎試，首先咬第一啖係軟林林，有好重既酒味，咬入去會Feel到有少量既威士忌液係口入面溶化，味道混入朱古力後瞬間溶化，口感很好，係會食一行唔夠再想食多行既朱古力，鍾意威士忌的人不容錯過。

Jack Daniel's Tennessee Whiskey朱古力
地址：各大超市
售價：$140
評分：8/10

LOTTE DARK strawberries朱古力：酸味較強 失去士多啤梨味道

同一款既朱古力．實際上既分別不大，都係融入假果汁既朱古力，而呢款既士多啤梨味就出D，酸D，味道偏怪，唔似能融入朱古力入面，味道稍遜。

LOTTE DARK straberry朱古力
地址：各大便利店
售價：$11.9
評分：5.5/10

DARS Nuts & Fruits橙味杏仁朱古力：橙味朱古力平衡得宜

失望既係以為見到封面有橙就會覺得會有好強勁既橙味，但又確實唔太覺喎，極輕微橙味，不過口感都有，食落去到食到點點朱古力口感，佢仲要係一粒粒咁食，極方便。

DARS Nuts & Fruits橙味杏仁朱古力
地址：各大便利店
售價：$11.9
評分：6/10

Knorr-Deli 墨西哥智利湯通粉：辣不出樣的湯底

經過上次食過既忌廉磨菇湯後，對於呢類杯裝即食即飲濃湯系列好感興趣，呢次試既呢款帶點辣既蕃茄湯底通粉，可能冇咁屈機既關係，感覺冇上次既咁香咁濃味，封面看似好辣，但其實冇想像中咁辣，而且唔知點解明明淥左3分鐘，D通粉都可以仍然咁硬，同上次一樣，令到呢杯野明明味道尚可但帶點瑕疪。

Knorr-Deli 墨西哥智利湯通粉
地址：28 Food
售價：$13.8
評分：6.5/10

Oreo 香蕉味夾心餅：假香蕉味的真Oreo

其實香蕉味既零食的香蕉味都好統一，食得出好假的味出來，亦因為冇驚喜，而夾係Oreo既中間，感覺上冇咩特別及難食之感，但唔會太想食有關香蕉味既零食了。

Oreo 香蕉味夾心餅
地址：28 Food
售價：$8.5
評分：6/10

明治北海道上辛薯片 香辣柚子胡椒味：比堅薯片同味更具味道

經過之前食堅薯片既柚子胡椒味既嘗試，今回輪到呢款明治出品既同一味道，結果呢款好食D喎，我本身並唔係鍾情濃味食品既人，但最基本係想食物有味先啦，呢個薯片就做到，胡椒好出，嗅覺上都有好強既柚子味，而外型上都好特別，碎上同埋係波浪紋薯片，視覺上同味覺上都比卡樂B同味薯片優勝。

明治北海道上辛薯片 香辣柚子胡椒味
地址：Citysuper
售價：$18
評分：7.5/10

堅薯片 柚子胡椒味：柚子甚至胡椒味唔夠強烈

其實卡樂B都有好多薯片系列喎，呢個堅薯片都係第一次食佢，會唔會薯片特別堅呢，確實真係冇乜關係，呢味柚子胡椒味略嫌唔夠堅，味道唔夠強烈，係聞到有柚子味，但嫌胡椒味被掩蓋，成件事唔夠突出。

堅薯片 柚子胡椒味
地址：Citysuper
售價：$12
評分：6/10

Croissant Taiyaki：熱辣辣但薄切切既酥皮鯛魚燒

我係未食過鯛魚燒既，行行下SOGO 又咁香，排場又吸引，就試下呢塊魚形酥皮好唔好食，佢係有三隻味既，包括紅豆、吉士打及朱古力，我就揀左最穩陣既朱古力味，幸好食個時係熱辣辣，效果的確更佳，係略嫌塊鯛魚燒太薄，使酥皮口感不足，朱古力醬又唔多，表面既杏仁片都幾多餘，無助味道提升，呢次一試覺得正路，味道未見突破。

朱古力味酥皮鯛魚燒($15)，外型係幾吸引，成塊野係酥皮，我食個時熱辣辣效果更佳，內含朱古力醬，內外兼備。

內含的朱古力醬都好濃郁，似豆沙餅入面既紅豆蓉口感，始終塊酥皮好薄，醬也見得較少，唔多夠喉。

Croissant Taiyaki
地址：銅鑼灣SOGO地庫B2
評分：7.5/10

周記油渣麵：香口油渣麵 非常邪惡食物

其實呢間野油渣麵超出名，我阿媽已經知道有呢間野既存在，可見歷史相當悠久，而我都係只係食過第二次，不過呢間野既油渣麵認真一絕，真係好好食。油渣雖油膩及肥，但食落去係外脆內軟，食落去成口油湧出來既感覺真係好爽！而且一碗麵裡好足料，食物質素好且價錢合理，做到油渣麵出名都不無道理，值得一食再食。

鮮牛肉油渣麵($48)，材料覆蓋整碗麵，一定飽肚，湯雖油但好香油味，油渣炸得外脆內軟唔容易，牛肉亦都好有咬口，價錢合理。

麵係似上海麵咁粗，麵底已經好多，麵質偏林，如果要有咬口硬硬少少既話，我相信會更好。

周記油渣麵
地址：深水埗福榮街117號地下
評分：8.5/10