泰廚泰國菜館：水準不俗 香脆蒜蓉包搽咖喱汁最出色

我就想搵下除左九龍城泰國菜比較出色外，其他地區有冇機會可以搵到一D同樣出色既泰國菜呢，我相信有的，今次係旺角搵到一間都比較像樣既泰國菜館，雖然食既野大同小異，但味道真係唔錯，價錢又幾合理，值得推介既係蒜蓉包再加咖喱炒蟹，蒜蓉包真係焗到好脆好香口，極香既蒜蓉味，蒜蓉又有誠意，最起碼成塊麵包都有，又燶邊，再搽上幾重味而唔算太辣既咖喱汁，真係一流！其實食物都味道不俗，又可以滿$200加$1既泰式粉絲沙律或泰式生蝦，真係窮人恩物。

泰式粉絲沙律($1)，冇錯，係其中一款滿$200+$1就可以食到既野，偏辣，略嫌洋葱過多，粉絲太少。

冬蔭大頭蝦湯($75)，少少辣但易入口，冬蔭功味道濃，可惜蝦肉較梅，有點可惜。

雞肉串燒($12)，肉質幾林，燶邊，有少許黑椒吊味，醃過既雞肉，唔錯。

和牛串燒($20)，話就話和牛，但其實同一般牛柳粒無異，係幾林既，反而醬汁冇乜味。

泰式生蝦($1)，另一款+$1既菜式，但真係冇九龍城個D咁好食，冇蝦味，得彈牙，不過$1算係咁啦。

泰式炒通菜($67)，唔用馬拉盞，用上麵豉醬一樣好味，我都幾鍾意食黃豆，令到呢碟通菜偏鹹，送飯一流。

椒鹽海鮮炒飯($72)，未試過椒鹽海鮮仲要係炒飯，結果有點奇怪，海鮮並冇椒鹽，只係炒飯個時落D粗鹽及辣椒就算，所以感覺係有點失望，但都幾好味。

蒜蓉包($28)，真係值得一食再食，超脆口又燶邊，誠意在成塊麵包都搽滿蒜蓉醬，Like。

泰式咖喱炒蟹($280)，壓軸出場既咖喱炒蟹有水準，首先食到好多蟹肉，之前食過好幾間都冇乜肉食，呢間肉質唔錯，咖喱汁亦濃郁，份量足料，好味！

泰廚泰國菜館
地址：旺角通菜街126號地下
電話：2749 9900
評分：8/10