Nabisco-Chip Star 香辣味薯片：辣味不足難過足癮

呢個牌子一系列既薯片於最近係各超市入面成日見到，味道就多，但確實能夠吸引到我既味 道鮮有呢雙辣味，可惜都係失望，個種辣味並唔係我地一般食開個種辣味，而係有點微芥辣由口腔浸出黎既辣味，係奇怪辣味而唔辣，或者我見識到呢隻叫唐辛子，不過唔多岩我。

Nabisco-Chip Star 香辣味薯片
地址：28 Food
售價：$9.8
評分：4.5/10

莎巴馬來西亞餐廳：惹味濃味 質素上乘

今年既情人節選擇了非西餐既餐廳裡跟女友慶祝，感覺其實都幾特別，至少唔會俾人劏到一頸血，又唔使覺得每年如一咁，加上呢間馬來西亞餐廳食物質素幾好，今次並冇失望。其實食物大致上都同普通泰國餐廳既大同小異，但要分得出邊度好食D就其實都好易分得到，在我角度黎睇係味道唔係好熟悉，唔係咁行，材料上唔會見得係揸流攤既其實都係一間有誠意，算係正宗既餐廳。呢間餐廳既食物算係足料，但係咪最Top又唔係，部份海鮮其實都好硬，好雪藏感覺，不過味道就偏濃，串燒都幾惹味，湯亦都感到落足料，有用心去煲個湯，整體而言，呢間雖然未至於好好食既馬來西亞/泰國餐廳，但有侍應們既用心態度招呼及食物既誠意度，呢間餐廳還是值得去食的。

蝦湯麵($88)，蝦肉幾爽，又夠多，麵亦都好煙韌，似上海粗麵，都值。

牛&雞串燒各3串($66)，雞比牛好味，除左因為肉感令到咬口較好，仲有燒得比較香，牛肉反而遜色一點，肉比較林，甚至有點梅，唔夠雞香口及夾到個醬汁，不過我女友話牛好食D，真係各人口味不同。

泰式冬蔭功湯($108)，真係出奇地好飲，好香既八角味，令到湯唔止有本身好濃既冬蔭功，配料都落足去煲，飲到唔啃又唔算話好辣，易入口，不俗。

蕉葉燒魚($228)，重頭戲，但反而希望越大，失望越大，唔係唔好食，只係冇乜特別，洋葱係煮得好淋，好入味，但魚就食唔出個鮮味，亦都融入唔到洋葱入面，亦唔算有好強既蕉葉味，兩者好似分開左咁，正常冇亮點。

馬來西亞貴妃苗($78)，清清地既一個好選擇，冇用好重既雞湯及蒜蓉去炒，但又食到菜苗裡既清澈味，係一眾重口味既食物當中有一味係清菜入口，係份外好食及中和返味道。

油鬆餅($38)，係我堅持要叫既一樣野，呢個都有少少失望，唔夠熱唔夠鬆軟，比較實，入口冇溶化感覺，再點咖喱都無補於事。

海鮮咖喱煲($168)，全晚最唔好食既一味，皆因食材唔理想，一眾海鮮都好硬，肉好梅，似浸左好耐，而且融入唔到咖喱味，而咖喱味又唔特別出色，唔夠椰香唔夠辣，整體最唔抵既一味。

莎巴馬來西亞餐廳
地址：灣仔謝斐道98-102號仁文大廈地下4&5號鋪
電話：2143 6626
評分：7/10

明治Meltykiss Pyramid 雪吻三角朱古力：金字塔形狀 內藏焦糖感覺不錯

上回試左黑朱古力，同時間亦推出左另一款金字塔形既焦糖朱古力，以前除左經典三角朱古力之外，又真係好少見其他牌子有三角形，Anyway，食落又係另一種感覺，內藏焦糖，咬一口後焦糖會流係口入面，分別食到朱古力及焦糖，夾到冇得輸，不過呢種感覺又唔算太新鮮，穩陣搭夠。

明治Meltykiss Pyramid 雪吻三角朱古力
地址：各大便利店
售價：$20.9
評分：7.5/10

明治Meltykiss雪吻Dark魅惑黑朱古力：極濃口溶朱古力 有口感

我係俾個包裝吸引，係幾靚幾Grand既，明治朱古力又更加穩陣，果然食落去真係唔錯，有極濃既朱古力味道，擺入口亦都有溶化朱古力既感覺，口感不俗，不過略嫌價錢偏貴。

明治Meltykiss雪吻Dark魅惑黑朱古力
地址：各大便利店
售價：$20.9
評分：7.5/10

卡樂B北國之鹽雪花蝦片：淡而無味 得個樣

我比較少食蝦片，因為總覺得蝦片本身冇乜野好食，味道好假同埋似炸物好熱氣，而今次試下就因為見到期間限定同埋外型吸引，點知都係好普通，淡而無味，跟普通蝦片冇乜分別，呢隻味更指明係有鹽份，但我又食唔出，呢次都只係得個樣，賣弄雪花型蝦片，一般。

卡樂B北國之鹽雪花蝦片
地址：各大超市
售價：$7
評分：4/10

卡樂B法式焦糖燉蛋味薯片：好香焦糖味 甜得黎好食

我記得初初食呢隻薯片前睇新假期雜誌狂介紹呢隻薯片，記者就話好好食，好有新意，先唔講好唔好食，就咁睇個包裝就確係有新鮮感，一反卡樂B薯片薯片系列包裝格局，而今次既新味確係吸引，法式焦糖燉蛋味淨係聽個名都Feel到High Class左，當然買黎試，食左後都食到有好香既焦糖味，而且甜甜地，幾似食緊燉蛋咁，又唔會太甜，以新味黎講算係幾突破，唔錯！

卡樂B法式焦糖燉蛋味薯片
地點：各大超市
售價：$8
評分：8/10

Knorr-Deli 本菇忌廉湯通粉：忌廉磨菇冇得輸 濃味好飲粉偏硬

我都係第一次食呢類食物，即係好似杯麵咁用滾水一淥就食得，呢次就試下最穩陣既忌廉磨菇湯通粉，因為冇得輸既湯底，真係好香，味道都頗濃，不過就好重味精，而且通粉浸左好耐都仲係偏硬，係失分之處。

Knorr-Deli 本菇忌廉湯通粉
地址：28 Food
售價：$13.8
評分：7.5/10

Jagabee 特濃湯W薯條：味精湯味 味道唔鮮明

第一個感覺係湯味薯條應該最易入味，我一直等終於等到Jagabee出湯味薯條，雖然只係叫做特濃湯W味，即係唔知咩湯，總之叫做特濃就應該當做入味。不過呢次係有點失望，就因為叫做特濃湯，所以食落去就等如食緊味精湯咁，味道唔算好鮮明，係只會食一次既Jagabee味道，唯有期望下一次出其他湯味吧。

Jagabee特濃湯W薯條
地點：青木町
售價：$12
評分：6/10

House Foods 厚切烤熏肉薯片：冇肉味 偏淡不突出

其實就咁睇包裝都唔係好吸引，不過最後都敵不過圖中的肥肉，好！就買黎試試佢，食落去又唔太覺有好重既肉味，偏淡，由於佢同我之前食既炸蠔味薯片係同系列，難免唔去比較，呢個肥肉係削好多，並唔突出，有點失望既係既然圖中既肥肉咁豐富，何解食落去塊薯片咁淡味而唔係好強勁既豬肉味呢？

House Foods 厚切烤熏肉薯片
地址：青木町
售價：$12
評分：4.5/10

芝士鱈魚：似食緊芝士條 冇任何魚既感覺

外型似一條條既鱈魚，點知食落去係極厚芝士，中間只見幾絲鱈魚絲，但芝士既份量過多，根本唔會覺有鱈魚絲係度，形成食一條已經好膩既感覺，幾唔爽！

芝士鱈魚
地址：28 Food
售價：$9.8
評分：4/10

森永美國特濃芝士曲奇：芝士認真濃的軟曲奇 很膩

初初就咁睇句裝真係以為係蛋糕仔，係芝士蛋糕，點知係曲奇餅，可惜得4塊，不過我食完第一塊之後就知道點解得4塊咁少，原因好簡單：好膩。曲奇餅有好香既芝士味，曲奇餅本身係軟身，入面仲有少許既芝士碎添，驚死唔夠濃芝士味咁，呢個特濃真係真心冇呃你，口感我就本身覺得軟得濟，普通啦，有時過濃都未必好既。

森永美國特濃芝士曲奇
地址：28 Food
售價：$12.5
評分：5/10

LAVELEE芝士及芒果雪條：兩味都好重味 食落既香但頗甜

食呢個雪條之前其實已經係冬日美食節食過，個次係第一次食既，見佢唔算平但仍然有好多人去幫襯，撇除佢地係崇韓之外，我相信呢條雪條一定有佢過人之處。嗯，又真係幾好食喎，我就主要食芝士味，我女友就食芒果味，芝士味比較好食一點，味道強烈多點，濃D，食落去口感好D，可能因為佢係芝士味關係吧，預期感覺會係軟林林咁，都會香口一點，芒果味都有好處，會清一點，感覺都好似食緊芒果肉咁，幾Fresh既。

LAVALEE芝士及芒果味雪條
地址：各大便利店
售價：$11.9
評分：7.5/10

卡樂B薯片 焗洋葱湯味：好勁洋葱湯味 幾濃而不膩

本身我都幾OK洋葱湯，亦都會想像到如果放入薯片既時候會係咩味，果然係有好勁既洋葱味，冇令我失望，仲有D鹹鹹地，相信係調味之用，食到咁上下雖然Keep住濃味但唔覺好膩，係已經唔錯了。

卡樂B薯片 焗洋葱味
地址：一田超市
售價：$12
評分：7/10

Emack & Bolio's：貴價雪糕多奇怪味 雪糕筒亦係賣點

想試好耐既外來雪糕品牌，明知貴到無倫都要試一試，仲要係食完個龍蝦包就過黎食埋個雪糕，真係好富貴！言歸正傳，外國雪糕係咪特別香特別好味？只可以話味道的確係有好多奇怪選擇，實在係好多都未試過而又想去試，但一時間又好難試晒咁多種味，呢次既味道都係我女人所揀，感覺係特別既，有D與眾不同，而且唔會太甜又幾清，又可以玩到好個球，不過今次試住三球先，而個雪糕筒就只係For影相用喇，實際就係好甜，唔太好食添。講真，呢間野不論裝修或是雪糕款都係賣相取勝。

流心蛋糕x鮮桃x黑桑莓朱古力碎孔酪+Sweet Cone($103)，係好貴，但味道真係未試過，先清後甜，感覺唔會重複而且各有特色，黑桑莓個味最好，有朱古力碎感咬口，呢次都冇失望。

真係有好多款揀架，有排試。

雪糕筒都要試幾款，不過我相信應該大同小異，只係影相影邊個最靚而已。

Emack & Bolio's
地址：中環閣麟街26號地鋪
電話：2505 6626
評分：8/10

LOBSTER CENTRAL：一流龍蝦飽 肉多飽脆

女朋友喜愛食海鮮，尤其係龍蝦及蟹肉，呢間野係佢介紹俾我既，嘩！好貴個飽，但都由佢啦，又未試過，係心痛的，不過食完後都會覺得好在冇後悔唔食姐，雖然未至於值得俾咁貴既錢去食，畢竟真心覺得個飽真係好食。

先食個重點推介既龍蝦包，係冇諗過咁多龍蝦肉，而且係啖啖肉，包你覺得滿足，肉係凍既，但唔會覺得好雪藏，肉本身既龍蝦味仍然係度，最緊要係個飽，外脆肉軟，又香牛油味，真心覺得好食；至於蟹肉亦都好食，蟹肉係碎上，但都好足料，跟龍蝦一樣，雖然凍但都保留肉身既味道，兩個包真係大滿足。

Truffle Fries($48)，由於我太鍾意食薯條，有你冇你叫左先，係冇乜特別但個黑松露醬好正。

Lobster Roll($138)，係貴，但肉多，包都好食，值得一試。

唔係渣流攤架，真係有好多龍蝦肉，好滿足。

Crab Roll($118)，蟹肉多到滿瀉，食完亦都好滿足，口感正。

Lobster Bisque($48)，龍蝦湯，頗濃，好強勁龍蝦味，飲完好頸渴。

LOBSTER CENTRAL
地址：中環士丹利街50號地下E號鋪
電話：3565 6725
評分：9/10

Ambrosia Oyster Bar & Grill：貴價紀念日晚餐 破天荒食生蠔 一致讚好 環境氣氛一流

事緣呢日係我跟我女人一起4週年紀念日，於是我就揀左間以環境氣氛吸引度強既餐廳，心諗既然過去幾年食既西餐大同小異，倒不如食間餐廳靚既又有View既啦咁，去到之後，我真心覺得呢間餐廳冇得彈，氣氛真係好好，夠靜，燈光又偏暗，情調十足，而且係對住夜景食飯，史無前例，今次真係揀岩左。我女人都好滿意。食物方面都水準十足，有見及此，我更破天荒食生蠔，終於明白點解D人尤其係我女人咁鬼鍾意食生蠔，原來係真係幾好食，食落去冇我以前食個D咁臭，仲啖啖肉，口感一流，當然係因為呢個價錢貴先有咁高質素既生蠔啦，無論如何，經過呢一日，我對生蠔改觀了，未必再抗拒生蠔呢。

其他食物而言，質素都係高質素，牛扒亦都值竹一讚，肉質鮮味好好。另外一讚係服務態度好好，侍應會好耐心咁聆聽我既提問及提供意見俾我，生蠔都係佢地介紹俾我，當然都係個句，咁既價錢就有咁既服務態度架啦，總言而之，呢間餐廳我俾好高分，因為呢個質素既餐廳值得俾咁高分。

送的餐飽及脆塊，係硬左D姐。

呢隻生蠔好似係黎自澳洲，成$98隻，個肉身就厚D，亦都係第一隻食，所以感覺係最好，唔腥，肉質都好鮮甜，彈口，真係好食。

呢隻係來自法國，$118隻，肉身就冇第一隻咁厚，但侍應話呢隻係攞獎，但我分唔出有咩特別，只覺得肉質都係好鮮甜，但就冇第一隻咁豐富口感，但都係好食。

法式海皇窩($358)，有波士頓龍蝦、北海道帶子、鱸魚、大蝦、蟹肉及龍蝦湯，好體貼咁分開兩個煲方便二人食用，湯極濃味，而且有點鹹，食材相當豐富，每款海鮮都足料，肉質口感都富層次感，絕唔會係搵笨之作。

意式蒜香辣意大利粉($138），雖然冇好顯著既主菜，只有意粉，但感覺都已足夠，少少辣而不寡，清清地，幾好。

炭燒厚切美國西冷牛扒配紅酒汁($538)，係超貴，但冇幾可既心情下食出好好既牛扒，5成熟剛剛好，肉質夠軟，牛肉汁好豐富，可惜由於之前食左好多野，食到牛扒已見膩，很不爽。

我有問侍應飲咩酒，佢最後俾左我呢杯有橙味既威士忌，幾好飲既。

好靚既Water Bottle

名副其實食個夜景，過程好浪漫，真係值。

餐廳環境真係一流，現場更有人鋼琴伴奏，一邊食野一邊聽歌係好浪漫，我亦都好享受呢種享餐過程。

Ambrosia Oyster Bar & Grill
地址：尖沙咀彌敦道63號iSquare國際廣場28樓2802號鋪
電話：2368 6901／2369 6902
評分：9.5/10