MILK TOP：重點在北海道牛奶 味道沒甚特別

行行下德福二期，突然間見到有間雪糕店，見岩岩食完飯食個飯後甜品都好，就試下呢間重點係北海道牛奶雪糕既Milk Top，款式唔算多，有甜筒或杯裝揀，於是揀左平時唔多食到既海鹽味及重點推介既北海道牛奶味，唔知係咪我揀得唔好，其實兩隻味差唔多，甚至食到最後已經分唔清邊隻味打邊隻味，味道尚算可以，但並唔特別，試過就算，比起其他雪糕店，我相信呢間真係比較削D。

黑車厘子番石榴甜筒($34)，我只食黑車厘子味，唔太酸，甚至係唔重車厘子味，感覺尚可。

海鹽北海道牛奶雪糕($34)，味道幾相近，海鹽味搶晒，反而北海道牛奶唔太重牛奶味，失色左少少。

款式不算太多，味道都幾普遍，想試新味道呢間未必適合。

MILK TOP
地址：九龍灣偉業街33號德福廣場二期4樓
評分：6.5/10

日月星快餐：又一欲罷不能的小店 炸雞脾出色

睇Openrice多好評，而我亦都好鍾意撐小店，就試下呢間名不虛傳既生炸雞脾，結果沒有失望，熱辣辣香噴噴，真係好好食，炸到外皮好脆口，肉質有口感，唔會淋又唔會好大浸雪藏味，食炸雞脾好唔好食其實好簡單，食第一口睇下脆唔脆已經可以俾分，食落去夠味仲要冇漏雪水咁先合格，呢間既雞脾真係做足一百分，當然人情味可以加分啦。呢間店絕對可以一黎再黎。

生炸雞脾+火腿三文治($29)，常餐，值得一讚係三文治係熱架，好耐未食過唔駛烘底既熱三文治，真心覺得有誠意，我覺得好好食，當然炸雞脾亦都好正。

炸雞翼炒公仔麵($38)，呢一味係睇Openrice推介先至叫，雞翼炸得好但幾重美極味，明顯係用美極醃過，足料，但感覺有點Dry，公仔麵炒得好乾身，令到食件事好乾。

凍奶茶好飲，好重奶味，幾滑。

我同女友喪落鹽，因為冇理由食炸雞脾炸雞翼唔落鹽架，唔夠十全十美架嘛。

其實呢間餐廳主要做外賣，所以店內比較少座位俾客人坐，我同女友算好彩，下午接近兩點時候黎有位坐，雖然係咁但我覺得好有風味，香港地Feel嘛，如果唔嫌熱左少少其實真係好好。

日月星餐廳
地址：九龍灣牛頭角道15-19號嘉和園8號地下
電話：2758 2153
評分：8.5/10

IKEA 抹茶雪糕：極濃抺茶味及質感 愛茶之人一定鍾意

IKEA難得出新野，於是試試佢，有我喜愛既抺茶，仲要配埋雪糕，極之濃味既抹茶，食一啖口裡面有強烈既抹茶雪糕黏住個口腔裡，抹茶香味可以停留係口腔裡，以咁既價錢食到質素幾好既雪糕仲要係IKEA，真係可以食多幾次，好過食新地啦

抹茶雪糕($4.5)

宜家家居美食站 IKEA Bistro

地址：銅鑼灣告士打道310號柏寧酒店地庫

電話：3125 0888

評分：8/10

添財記粥腸粉茶餐廳：炸兩脆口 咸白粥夠味 清清地好選擇

九龍城係多美食，但有時食得多都想清清地，唔使食咁多肉類咁濟，於是今次試試下Lunch食個粥食個炸兩清腸胃。冇理由去粥麵店食麵架，所以揀左平時幾鍾意食既牛肉豬紅粥試過究竟，仲要好耐未食過既咸白粥，結果感覺唔錯，好耐冇食過呢D街坊味道，有Heart，小店價錢，店員親民，小店的確係好值得人留低，食物味道好唔好係其次，人情味好難搵架，呢間店值得一黎。

普通炸兩($15)，油炸鬼脆的，配上唔係食慣既豉油，唔錯。

蝦米腸卷炸兩($25)，呢味特別之處係多左蝦米及葱，當堂升左呢，因為香口左，正如煎腸粉一定驘蒸腸粉，哈哈。

牛肉豬紅粥($23)，咸白粥底，好入味，相信落左唔少味精，不過好耐冇食過咸白粥，久唔久食下有乜所謂，牛肉落左米粉再撈，有醃過有誠意。

添財記粥腸粉茶餐廳
地址：九龍城龍崗道35號地鋪
電話：2383 9664
評分：7.5/10

Little Vegas：餐廳裝修有特色 食物質素尚算可以

呢餐飯約左好耐，係因為班朋友們時間勁難夾，半年後先見面，亦都係生日飯，所以挑選了呢間裝修幾有特色既餐廳一試，都好有美國漫畫元素，亦有好多兒時回憶，糖果、老虎機、骰仔調味料樽等等，食物方面亦都頗向美國菜，選擇不多份量亦不多，所以今次主要係食個環境，講真食物質素亦都尚算可以合格。不過，好奇怪係每一枱都只能用餐九十分鐘，但每樣食物都上枱得好快，九十分鐘係足夠的，呢樣真係吹佢唔脹，佩服。

魷魚圈，炸物同魷魚好易分開，已算炸得唔好，但食落算係脆口。

明太子天使麵，首先我對明太子冇乜好感，但呢個麵個味道又接受到，亦都同個天使麵配合得幾好，唔錯。

炸洋葱圈，都係咁，冇乜特別，係個醬有D唔同。

水牛城雞翼，個醬唔錯，但個炸物幾厚，食到一層炸物先食到雞翼，唔知雞翼係咪醃過，夠晒味。

黑松露香菇Pizza，淡而無味，理想係好香既菇味加濃味芝士，點知乜都冇味，得個快字，有點失望。

意式雲吞，亦都冇味，但聞到菇味，不過得三隻，唔知點分。

雲吞入面應該只有菜，但係咩菜呢？食唔出。

玫瑰雞翼，同水牛城雞翼差唔多味，只係多左玫瑰露汁。

海鮮喇沙Pizza，九唔搭八，係幾得意同味道唔錯，但總係覺得古怪，未試過食Pizza有豆卜，冇下次。

辣肉醬扁意粉，幾辣，又係有菇，不過只係辣的肉醬意粉罷了。

Little Vegas
地址：銅鑼灣耀華街3號百樂中心25樓
電話：2622 2369
評分：7.5/10

皇朝私房火鍋：食到海鮮鮮味 壓軸鮮味粥係精髓

呢晚係因為工作關係而跟同事去食既火鍋海鮮宴，地方係比較偏，但係值得一食，好難得係海鮮打邊爐，仲要有咁多人先食到好多好野，的確呢餐係好好食，係因為難得地只食食物本身既味道，係冇其他調味料去配襯，純粹齋食個食物，本身係海鮮做主打，然後先叫其他肉類菜類，當中最精彩係羊肉，超級騷，羊味好夠，好明顯係有醃製過，但呢種極騷羊肉係未食過，真係好夠味；另外，糯米飯都好正，份量雖少，呢幾啖飯就足以令佢升上神枱，唔油膩，可能吸收左其他食物既味道去蒸，所以精華吸收晒以致入味十足；海鮮方面，魚好滑，大蜆好爽口鮮甜，蟹肉嫩滑肉質鮮甜，手打麵好煙韌，可能因為食物通通都係經過醃製然後去蒸，將所有汁吸收晒食物之中，令到肉質及味道提升另一種境界，就係呢餐既精妙之處，冇得唔試的火鍋。

皇朝私房火鍋 King's Dynasty
地址：紅磡崇志街20號地下
電話：2350 5050
評分：9/10